Slökkvilið Ísafjarðarbæjar var kallað út um klukkan 21:30 í kvöld vegna vatns sem var byrjað að flæða inn í sjúkrahúsið á Ísafirði. Í fyrstu var hægt að halda aftur af vatnsflaumnum, en þegar háflóð var í kringum miðnætti var vatn farið að flæða upp um niðurföll í kjallara.
Beytt var var vatnssugum og minni dælum og tókst að ná gólfi þurru um klukkan 02:00.
Þetta er ekki í fyrsta skipti sem slökkvilið dælir úr kjallara sjúkrahúsins, en með reglulegu millibili hefur slökkvilið verið kallað til aðstoðar á sjúkrahús vegna vatnsaga. Í flestum ef ekki öllum tilfellum hefur það verið samhliða hárri sjávarstöðu og asahláku líkt og var í kvöld.

Mbl | 21.3.2007 | 21:36
Það leikur enginn vafi á því að slökkviliðsmenn hafa mikilvægu hlutverki að gegna í samfélagi manna en ef marka má nýja rannsókn þá er starfið hinsvegar ekki gott fyrir hjartað því slökkviliðsmenn eru sagðir líklegri en aðrir til að deyja af völdum hjartabilunar.

Fram kemur í rannsókninni, sem The Harvard School of Public Health gerði, að þrátt fyrir augljósar hættur líkt og brunasár og innöndun reyks við störf þá er „meginorsök dauðsfalla hjá bandarískum slökkviliðsmönnum við skyldustörf hjartasjúkdómar sem stafa af völdum kransæðastíflu“....

Rauði kross Íslands hefur afhent Slökkviliði Ísafjarðarbæjar nýja sjúkrabifreið til afnota. Bifreiðin er af gerðinni Bens Sprinter árgerð 2007 og flutt inn af bílaumboðinu Öskju. Breytingar voru gerðar af Sigurjóni á Ólafsfirði. Þorbjörn slökkviliðsstjóri sótti bifreiðina í síðustu viku og var lokið við að gera bílinn útkallshæfan í dag. Svona við fyrstu sýn virðist bíllinn vel heppnaður og von okkar er sú að hann eigi eftir að reynast vel.

Mynd vikunnar að þessu sinni er af öðrum stórlax hjá Slökkviliði Hafnarfjarðarsvæðisins, enginn annar en Gunnar Björgvinnsson. Gunnar starfaði í nokkur ár hjá Slökkviliði Ísafjarðar og á þessari mynd er Gunnar að kenna Ísfirðingum handtökin á slökkvitækjum.

bb.is | 16.03.07 | 06:38
Brunavarnaáætlun Slökkviliðs Ísafjarðarbæjar fyrir árið 2007 var lögð fyrir umhverfisnefnd á dögunum og tekin til umfjöllunar. Á fundinum lagði nefndin til við bæjarstjórn að brunavarnaráætlunin verði samþykkt, en óskar jafnframt eftir að tæknideild geri kostnaðaráætlanir vegna lagfæringar og stækkunar á núverandi slökkvistöð, sem og vegna uppsetningar og eftirlits á eldvarnarkerfum í skólum og leikskólum Ísafjarðarbæjar. „Umhverfisnefnd bendir á nauðsyn þess að eldvarnarkerfi, sem eru í fyrirtækjum og stofnunum séu beintengd við vaktstöð“, segir í fundargerð nefndarinnar.

bb.is | 13.03.07 | 06:02
Bæjarstjórn Ísafjarðarbæjar lagði á dögunum til að bæjarstjóra og bæjartæknifræðingi yrði falið að hefja viðræður við sýslumanninn á Ísafirði og Slysavarnafélagið Landsbjörgu vegna mögulegrar byggingar á sameiginlegri slökkvistöð, björgunarmiðstöð og lögreglustöð fyrir svæðið. Á fundi bæjarráðs á dögunum gerði Sigurður Pétursson, bæjarfulltrúi Í-listans, athugasemd við fyrirhugaðar umræður og lét bóka að hann teldi ekki rétt að bæjarstjórn eða bæjarstjóri Ísafjarðarbæjar hefði frumkvæði að viðræðum um byggingu lögreglu-, slökkvi- og björgunarmiðstöðvar í Ísafjarðarbæ. Í bókun Sigurðar segir m.a.: „Ekkert formlegt erindi hefur borist bæjarráði um þetta mál frá sýslumannsembættinu eða öðrum aðilum. Engar áætlanir um slíka byggingu hafa verið ræddar í nefndum eða ráðum bæjarins eða sýnt fram á brýna þörf málsins. Staða bæjarsjóðs leyfir ekki stórfelld útgjöld á þessu málasviði þegar önnur stórverkefni standa fyrir dyrum svo sem bygging nýrrar sundhallar.“

Lagði Sigurður til að málinu yrði frestað um sinn, og samþykkti bæjarráð það en bókaði jafnframt að bæjaryfirvöld skyldu gæta þess að vera samstíga öðrum aðilum í málinu.

Myndin er tekin árið 1995 og á henni eru þeir Jóhann Andrésson og Stefán Tryggvason. Líklega er verið að fara yfir gátlista eftir einhverja æfinguna. Þeir eru báðir hættir í slökkviliði Ísafjarðarbæjar, en þeir voru hlutastarfandi á sínum tíma.