Slökkvilið Ísafjarðarbæjar fékk tilkynningu  kl 07:23 um að eldur logaði í moksturtæki sem statt var í Hnífsdal. Var sendur einn bíll á staðinn, en ökumanni moksturstækis hafði tekist að slökkva eldinn áður en slökkvilið kom á staðinn. Eldsupptök eru ókunn, en eldurinn logaði í vélarúmi. Að sögn eiganda vélarinnar eru skemmdir talsverðar.

Eins og glöggir lesendur hafa væntanlega tekið eftir hafa færslur á vefin verið fáar síðustu daga. Ástæðan er bilun í tölvubúnaði hjá okkur, en núna er allt komið í lag. Því er ekki seinna vænna en að henda inn mynd síðustu viku. njótið vel.

Um klukkan 06:00 óskaði áhöfn bb Gunnars eftir því að sjúkraflutningsmenn færu með bátnum út að flutningaskipi sem lónaði út af Skutulsfirði. Um borð í skipinu var veikur sjómaður sem þurfti að komast undir læknishendur. Komið var að flutningaskipinu um kl 06:40, en vegna hvassviðris og ölduhæðar þótti ekki öruggt að flytja sjómanninn milli skipa og var því ákveðið að flutningaskipið myndi leggjast að bryggju á Ísafirði og var það komið að Sundahöfn um klukkan 07:10. Að sögn sjúkraflutningsmanna sem fóru með björgunarskipinu í morgun var ferðin skemmtileg, en frekar holótt (veltingur).

Í dag var slökkvilið Ísafjarðarbæjar fengið til að fjarlægja eiturefni úr húsi í Dýrafirði. Eigandi húsins hafði verið að taka til á háalofti þegar hann rakst á tvo brúsa sem innhéldu fljótandi Níkótín. Hafði hann samband við lögreglu sem kom boðum á slökkvilið. Samkvæmt þeim upplýsingum sem slökkvilið Ísafjarðarbæjar fékk um efnið er það mjög hættulegt við innöndun og snertingu á húð. Var því efnið sótt og því komið til aðila sem eyðir því á öruggan hátt.

Æfingin á Flateyri tókst vel, farið af yfir tækin á staðnum og æft á þau. Það var góð mæting og bara góð stemming í mannskapnum. Áhuginn var svo mikill að ákveðið hefur verið að bjóða strákunum á Flateyri á næstu æfingu Ísafjarðarliðs sem haldin verður núna í lok vikunnar. Búið er að setja inn myndir sem teknar voru á æfingunni.

Eins og sagt var frá reyndum við að gera skautasvell á Wardstúni fyrir um tíu dögum. Afrakstur þeirrar vinnu var asahláka og brotinn brunahani. Nú hefur fryst aftur og búið er að laga brunahanann og samkvæmt langtíma veðurspá ætti að haldast frost í einhverja daga. Með tilliti til þessa fórum við af stað í morgun og skrúfuðum frá, okkar bestu vonir gera ráð fyrir því að skautasvellið ætti að verða tilbúið seinni partinn á morgun.

Í kvöld mánudag  ætlum við að halda æfingu á Flateyri. Pétur liðsstjóri vill byrja kl 18:30 og æfa fram eftir kvöldi.